Goodbye Gaymat, Hello Luxembourg Pride!

Hues du et scho gesinn? Hei an do huet de Logo vum GAYMAT sech verännert! An dat huet e ganz einfache Grond: Mir feieren den 20ten Anniversaire an als Kaddo kritt eise Pride-Event en Rebranding verpasst.

Ales wierdegen an Neies begréissen!

Mat dësem Lifting wëlle mir op kee Fall ausdrécken, datt mir dat “Alt” op den Tipp geheien. Ganz am Géigendeel! Den Organisatiounscomité vum GAYMAT, dee souwuel aus engagéierten, alagesiessenen an och neie Leit besteet, ass sech der Verantwortung bewosst, déi d’Organisatioun vun dësem Event, mat Traditioun a Wichtegkeet fir d’Groussregioun, bedeit. D’Geschicht vum GAYMAT, wou dësen hirkënnt a wéi e sech entwéckelt huet, wäert ëmmer e liewegt an zentralt Element vun all Editioun bleiwen, sief et a Form vun Ausstellungen, als Beiträg a Publikatiounen, als Infotafel um Stroossefest oder op soss eng Manéier.

En Event, dat interessant fir seng Visiteure wëll bleiwen, muss sech awer och reegelméisseg a Fro stellen, munches wat net fonctionnéiert oder net méi aktuell ass, muss auszortéiert gi fir datt Plaz ass fir nei Iddien. D’Weiderentwécklung vun der Gesellschaft an och vun all eenzele Visiteur ass d’Motivatioun fir dëse Rebranding duerchzefeieren.

Also: e Fest fir jiddereen!

Desweidere stelle mir fest, datt den Numm, GAYMAT, dee fir eis zënter ville Joren esou selbstverständlech war, haut net méi vu jiddwerengem verstane gëtt. Visiteuren, déi kee Lëtzebuergesch verstinn, kënne mam Numm GAYMAT net vill ufänken. Och méi jonk Generatioune schwätzen den Numm ëmmer méi dack falsch aus, woumadder dat flott Wuertspill verluere geet. An wat nach vill méi wichteg ass: Mir sinn eis bewosst ginn, datt den Numm net deem gerecht gëtt, fir wat e steet: d’Inklusioun vun alle Minoritéiten ënnert dem Reebou. Mir hunn dofir d’Chance genotzt, fir iwwert dëse Rebranding jiddereen ausdrécklech ze invitéieren a mat anzebezéien. Gläichzäiteg erméiglecht eis dat eng méi einfach Kommunikatioun.

De GAYMAT resp. d’LUXEMBOURG PRIDE lieft selbstverständlech nëmme vun deene ville fräiwëllegen Hänn, viller Aarbecht an duerch déi tatkräfteg Ënnerstëtzung vun eise Sponsoren. Wëlls du eis dobäi hëllefen, den 20te Gebuertsdag vum GAYMAT, Pardon, vum LUXEMBOURG PRIDE zu eppes Groussem ze maachen? Da kuck emol hei laanscht.